我諗大家都冇辦法唔認同一樣嘢，就係當你準備開餐廳或者開發新嘅菜式嘅時候，要諗一個吸引到客人嘅菜式名，絕對係一件好重要嘅事。

一道好嘅菜式名往往係影響客人選唔選擇點呢度菜嘅其中一個重要因素

有時候你睇到廣告或者社交媒體嘅時候，可能都會遇過，齋睇到個菜式名同描述，就已經想去試下食，呢種畀人刺激到食慾嘅情況同經歷。

如果你遇過呢種經驗，就已經證明咗人哋係成功做到改一個好嘅菜式名呢件事。

人哋做得到，冇理由你唔得㗎嘛係咪??

以下我哋整理少少相關嘅諗法，睇下點樣可以做一個成功嘅菜式名

一般嚟講菜式名最基本就係佢用咗乜嘢食材+烹調方式，清楚畀人知道係乜嘢。

但如果你想將嗰度菜式用響餐廳、食譜等等需要吸引人哋目光嘅情況時，除咗上面呢兩個基本嘅資訊之外，就開始需要諗下佢究竟仲有冇其他賣點可以傳達畀你嘅目標顧客知道。

簡單啲嚟講就係一句說話之內，講出菜色嘅重點

呢一句說話唔可以太長，就算你有好多想要傳遞嘅資訊例如食物成分、產地、食物安全等等，都唔可以全部放曬落去，咁樣你句說話就會太長，長到人哋冇辦法記得到。

你可以諗就好似睇戲時候睇字幕一樣，一秒之內正常人都係四至五隻字，所以頂到盡都係十隻字以內就要完成你道菜式名。

咁好啦，實際應該點操作呢??

要最容易畀客人想像得到啲食物好唔好味，最主要就係傳遞到個特徵同佢連帶相關嘅想像

例如你餐廳係賣咖哩，咁你可以由世界各地食到嘅唔同種類咖哩辣度、配料香料特徵入手，例如︰

混合17種香料特濃咖哩

雙倍椰香馬來咖哩

適當咁運用配料同烹調手法上面同其他人有分別、自己店舖獨特手法或者配方特點，用簡單文字表達出嚟，令佢變成一個可以引人注目、甚至惹人暇想嘅名稱。

另一種手法就係用口號式

好多日本餐廳都會用咁樣嘅手法處理，例如︰

「極限●●」「極品●●」「人氣!!」「激安!!」「超多汁●●」「新感覺●●!!」

去表達嗰款食品有幾吸引。另外仲有一啲參考︰

例如使用隱喻「惡魔的味道」「媽媽的味道」等等。或者日本餐廳最鍾意用嘅限定、產地直送都係常用嘅口號式表達方法

仲有一種味道方面嘅表達方式

「辣」……超刺激、勁辣、地獄辣、十級辣

「甜」……蜂蜜味、初戀一樣甜

以上都係喺啲參考嘅例子，雖然未必可以用於所有嘅情況，但係可以睇到個方向就係，你可以依照住你所提供嘅食品特色，去搵出類似具體表現，放落去菜式名稱嗰度使用。

有時候甚至可以試下查字典搵同義詞去用，都不失為一種方法。

使用擬聲詞

另一種都好常用於餐牌名稱設定嘅手法就係擬聲詞。因為擬聲詞基本上係模仿現實生活中遇到嘅聲音去表現，可以輕鬆咁畀到客人直接嘅感覺同相關聯想，可以有效咁刺激人嘅想像力。

生活中最經典嘅例子就係啫啫雞煲同埋卜卜蜆，基本上唔使畀你睇到個畫面，你自己都可以喺腦裏面想像到出嚟，呢個就係擬聲詞嘅威力。

刺激聽覺的擬聲詞

烹調食物時候嘅聲音，淨係聽到已經令人胃口大開，如果你按照住菜色上面嘅烹調方式去諗點樣表達，你都好有可能會搵到一個獨步天下嘅全新菜式名，令人對你餐廳留低超級深嘅印象，以後一提起嗰個名就知道要去你嗰度食，你話幾咁巴閉??

刺激觸覺的擬態詞

無論係軟滑抑或係鬆脆，只要可以通過表現食物觸感擴大味道嘅形象，最重要去表達你所提供嘅食物畀人嘅印象，方便顧客喺食物或者點餐之前，可以想像究竟係一個點樣嘅菜式，都係可以考慮嘅取名方式。

另外仲可以加入食材嘅主要生產地

一般情況下，顧客潛意識裏面都會認為，響菜式名稱或者產品名稱加入主要食材主要生產地、或者指名係邊一個地方特產，就可以提高嗰個舖頭對佢食所提高食材嘅承諾可信程度，同時有效吸引顧客嘅興趣。

或者可以考慮加入四季時令相關嘅詞語

如果你所提供嘅食品係有限定季節，或者大家通常習慣會響邊一個時節去享用、大家公認響某一個季節特別肥美好味，例如日本有響夏天土用之日食鰻魚嘅習慣，佢哋改名嘅時候好多時都會加入相關資訊；又或者香港常見嘅例子秋冬會食煲仔飯、蛇羹進補一樣，呢啲都係可以考慮嘅方向。

最後就係利用具體數字

呢種手法可以畀到人哋一個較為確切資訊，知道或者認為你付出咗幾多功夫去處理食物；通過呢一種取名嘅操作，提升咗客人對你嗰一件食品嘅興趣同信賴感覺，你就可以用包含特定數字嘅方式你突出嗰種菜餚嘅魅力。

就好似以下呢啲例子咁︰

72小時慢煮豬軟骨湯麵

800度窯燒烤製脆皮薄餅

1年熟成牛肉

秘製醬料24小時浸泡

都係一啲可行而且常用嘅菜色名稱取名手法，去提高客人對你嗰一種食物嘅興趣，直接或者間接提高點餐率同生意額。

結論︰無論係咩方法都可以，最重要係你要搵到個特色出嚟

菜式名係影響餐廳究竟吸唔吸引到顧客嘅其中一個重要因素，你可以諗到好特色嘅名出嚟，自然就有更高嘅機會吸引到客人；你亦都可以諗出好誇張嘅名，去達成惹人注目嘅目的。不過就要小心一樣嘢，就係曾經有一啲餐廳，選擇太過誇張嘅名，而導致問題發生，例如觸犯商品說明條例，或者畀顧客質疑真實性等。

要譁眾取寵係個人選擇，冇話可唔可以；但請緊記要適可而止，唔好玩出火，要平衡效益同效果，先至可以成功咁幫你嘅餐廳菜色改到好嘅名，得到相應嘅利益。