其實買肉唔一定要顏色鮮紅嘅先至係好嘅

點解咁講呢？

其實係因為牛肉同豬肉呢一類紅肉嘅顏色，係來自佢哋肌肉入邊嘅肌紅素。

本身動物物種嘅差異已經會影響肌紅素嘅含量，動物本身嘅年齡大小都會有影響，年齡越大嘅動物，肉嘅顏色會越深。

另一方面，屠宰完嘅肉處於邊一種狀態，都會影響肉嘅顏色，其實變化會相當大。

舉個例，當屠宰之後立即進行真空包裝的話，肉嘅顏色其實會因為響缺氧狀態之下偏向紫色。

如果你打開咗個包裝，肉裏面嘅肌紅素接觸到空氣，大約兩三個鐘頭左右，肉嘅顏色就自自然然會變為鮮紅色；而當肉類入面嘅肌紅素同氧氣接觸超過七個鐘頭的話，肉嘅顏色會慢慢變到更加深紅。

更進一步的話，經過一星期以上同氧氣嘅接觸，肉嘅顏色又會逐漸變成偏紅褐色。

咁係唔係紅褐色嘅肉就唔好呢？

又唔係喎，原來如果係進行乾式熟成處理的話，肉嘅顏色一樣會變成比較深色。但因為係刻意咁做，去令肉嘅風味變得香醇濃厚，而且肉質柔軟，反而仲更加係好嘢來添。

比賣肉耽誤咗嘅攝影師

仲有一樣嘢，唔知大家有無留意，就係肉檔本身就好醒嘅，明明唔係本科做攝影，但都自帶技能識得配合【打燈技巧】，即係用帶紅色燈光去令肉類睇起嚟更加鮮紅；晌燈光影響之下，有機會令你增加判定，認為【舊肉顏色幾鮮，靚呀】…最初開始運用呢個技巧嘅人，絕對係比賣肉耽誤咗嘅攝影師。